الجمعة، يونيو 13، 2008

أنا أوبونتو

(أوبونتو .. عندما تهب رياح الحرية من القارة السوداء)

أخيرا *... عرفت أسطب اللينكس علي جهازي

إمبارح سطبت لينكس إصدارة أوبونتو، اللي فعلا أكتر من رائعة، معرفش إن كانت هي الأفضل تقنيا ولا لأ، بس الشعبية اللي بتتمتع بيها هي أفضل ما فيها ، أي مشكلة وقعت فيها، تأكد إن مئات من الناس وقعوا فيها برضه، وتأكد إن عشرات من الناس تمكنوا من حل المشكلة ونشرها علي المنتديات

كانت لي تجربة فاشلة في عام 2003 مع نظام التشغيل "ماندريفا" كان اسمه
"ماندريك" أيامها، لقيت العملية صعبة ومرهقة جدا، كان كارت الفاكس بتاعي مش مدعوم في النظام، وماكنتش بعرف أدخل علي النت، إلي جانب صعوبة إعداد اللغة العربية، وكان تسطيب البرامج صعب جدا بالنسبة لي، إلي جانب إن الهارد بتاعي كانت مساحته 20 جيجا بس، يعني مش هاينفع أخلي نصف المساحة بتاعته أنظمة تشغيل، باختصار .. الدنيا كانت ضلمة تماما

أما دلوقتي، النسخة دي فيها مميزات جامدة جدا ، منها:
1- إمكانية تجربة النظام من غير تسطيب، لايف يعني
2- الواجهة الرسومية، روعة
3- كثرة البرامج الملحقة مع النظام، جيمب لتحرير الصور، أوبن أوفيس للبرامج المكتبية، بيدجين للشات بيدخل علي كل حساباتك ياهو و هوتميل و جوجل وغيرهم في نفس الوقت، ده طبعا غير الفايرفوكس حبيب قلبي اللي ماعرفش أدخل النت من غيره... دول اللي أنا جربتهم لغاية دلوقتي، عملية الاستكشاف لسه مستمرة


لست أدري ما سر إصرار أصحاب المصادر المفتوحة علي تسمية برامجهم بأسماء قابلة للنطق بأكثر من طريقة،أوبونتو كنت أنطقها يوبينتو وأجد صعوبة في التعود علي النطق الجديد ... حتي الآن أنا غير متأكد من طريقة نطقي لكلمة لينكس

طبعا مفيش داعي أقول إن التدوينة دي، عاملها من الأوبنتو، أول موضوع أكتبه في حياتي من داخل اللينكس

_____________________________
*
واضح إن الكلمة دي هاتقروها كتير في تدويناتي إن شاء الله


هناك 5 تعليقات:

  1. هو ايه البتاع اللى انت قلت عليه دة؟ معلش انا اصلى جاهلة اوى فى النت يعنى والكمبيوتر والحاجات دى وباعتبر اى حد بيتعامل مع الاختراعات دى كاهن عنده اسرار باة وكدة يعنى بس هى ديتها كورس لمدة 97 سنة وابقى فل واقولك ساعتها رايى فى الموضوع الخطير دة الى اللقاء بعد الكورس

    ردحذف
  2. والله يا أخت إنجي دي مسألة إمكانيات، وكمان الحكاية مش حكاية علام، دي حداقة ومفهومية

    ;-)

    ردحذف
  3. ايه ياعم دى باين عليها شتيمة والله اعلم ماشى يا عم يا ابو المفهومية والحداقة........ طب والنبى شويه مفهومية شيل بيهم تاكيد الكلمة اللى فى التعليقات

    ردحذف
  4. ياريت كان ينفع، دي خنيقة قوي، خاصة لما النت يكون بطيئ وتكتبي الكلمة وتطلع غلط

    ردحذف
  5. معلش بقى شوية مفهومية وحداقة واتفرد عليك شوية واقولك ينفع تشيلها جرب و استخدم شوية من المفهومية وانت تشيلها ياعم..... لو ماعرفتش تشيلها هابقى احجز لك معايا فى الكورس وهى كلها97سنة وتعرف تشيلها سلاااااااااااام

    ردحذف