أوبونتو من جديد

باقي من الزمن 6 أيام علي طرح النسخة الرسمية من أوبونتو، يارب يكونوا صلحوا مشكلة النت واللي خليتني أشيله من علي جهازي للأبد.

بانتظار الإصدار الجديد بفارغ الصبر، ودي هاتبقي تقريبا المرة العاشرة اللي أسطب فيها اللينكس بعد ماكون قررت عدم العودة إليه نهائيا، أعمل ايه..... بحبه.

الغروب في وادي دجلة

يوم الجمعة 17 اكتوبر2008: رحلة سريعة لوادي دجلة أول رحلة بتنظيم مجموعة رحالة علي الفيس بوك

أنا حطيت الصورة دي عشان ماحدش يفتكر إني انطوائي وبكره الناس ولا حاجة لا سمح الله
مع إن الواحد برستيجه ضاع في الصورة دي خالص
(حقوق النشر محفوظة لـ حسام مختار مؤسس جروب "رحالة")

علي باب الحمام.. الرأي.. والرأي الآخر

الجامع الأزهر

يوم الخميس اللي فات، كنت في انتظار أحد أصدقائي داخل الجامع الأزهر في القاهرة، صديقي ده اتأخر عن ميعاده بساعة تقريبا، بس أنا ماكنتش متضايق قوي لأكتر من سبب: الأول، هو إن أنا كنت بالفعل جاي متأخر عن الميعاد بس حظي إني وصلت قبله ، والثاني، هو إن القعدة جوة الجامع ممتعة لأبعد حد، جو الجامع من جوة تحفة: العمارة الإسلامية الرائعة، صحن* الجامع الواسع اللي الهوا فيه يرد الروح ، منظر الأطفال الصغيرة وهم بيجروا ورا بعض علي الأرضية الرخام البيضاء.

المهم، صاحبكم كان مزنوق، قلت أدخل الحمام، وجوة لقيت المنظر الظريف ده:

أول برنامج ليا

أول برنامج أعمله في حياتي من الأول للآخر لوحدي بفيجوال بيسيك 6 ، الصراحة البرنامج علي صغره تمكن من إشباع رغباتي الجامحة في البرمجة، أنا كنت خلاص، هابرمج علي روحي.

البرنامج صغنطوط بس مفيد في الشغل بتاعنا، وحاز علي إعجاب زملائي في الشركة.