الاثنين، أغسطس 20، 2012

المحتقر لذاته

أيام ثانوي قررنا انا وصاحبي إننا نحاول نمشي مع بنات، وده كان يستلزم إننا نشوف بنتين نرزل عليهم. بدأ صاحبي يهزر مع واحدة وانا اتراجعت في آخر لحظة، وسبقته بخطوة سريعة ولما حصلني قالي ان واحدة منهم ضحكت، بس كنت انا بالفعل تخليت عن المشروع من أساسه.

بحاول افكر دلوقتي في السبب، ولقيت إن تراجعي مكنش بسبب أخلاقي أو تديني، بيتهيألي أنا تراجعت عشان من جوايا مكنتش بحتقر نفسي، فكرة إنك تقتحم المساحة الشخصية لحد تاني وتحط نفسك تحت رحمته يقبلك أو يصدك فكرة مهينة جدا لأي إنسان عنده قدر من الاعتزاز بالنفس.

يمكن هي دي نفس الفكرة في لغتنا الدارجة  لما تطلب من حد انه "يحترم نفسه" مع إنك عمليا بتطلب منه إنه يحترم شخص تاني غير نفسه، وكأن الشخص اللي بيحترم نفسه (معتز بنفسه) بيترفع عن أي عمل وضيع ممكن يوسخ صورته الناصعة وقميص سمعته النظيف الأبيض.



شايف إن تصرفات المتحرشين ليس إلا لأنهم بيحتقرو نفسهم، وعنفهم في التحرش مرتبط طرديا بقدر احتقارهم لأنفسهم، حاسين بإنهم غايصين في القذارة لحد راسهم، وبالتالي المزيد من الإهانة الملحقة بالتحرش لن تضر، وتأثيرها لا يذكر بالنسبة للخرا اللي عايشين فيه.

أكيد لما اشوف الموضوع بيحصل قدام عيني مش هاتعامل مع المتحرش بمنطق "ياعيني يابني بتحتقر نفسك"، ولا أمانع إطلاقا في فشخ المتحرش لحد مايعرف ان الله حق، بس لو عايزين نحل المشكلة على المدى البعيد مفيش أي حل هاينفع خارج إطار إننا نزود اعتزاز الناس دي بنفسها، ونعرفهم إن من حقهم يعيشو حياة أحسن من كده، وده مش فضل عليهم من حد وإنما هو حقهم اللي لازم يقاتلو عليه أي حد عاوز يسلبهم إياه، أو اللي بيطالبهم بالصبر وبيقنعهم إن هي دي سنة الحياه وحكمة ربنا في خلقه.

هناك تعليق واحد:

  1. كلامك مظبوط خصوصا ع المدى البعيد الناس دي لازم تفهم إن بإيديهم هما يخلوا الحياة حلوة مش بغيد حد تاني .... بس برضه لازم حل ع المدي القصير فعلا

    ردحذف